اصدقاء شربل روحانا

 

 

 

شربل روحانا لموقعنا : أجمل شي اللي بيعلقنا بهالمنطقة الفنون والآداب .
عم حاول ما خلّي الأحداث السياسية والأمنية تأثّر على حلمي وطوحي و تعاطي الايجابي بالحياة .

للمرة الثانية في سوريا هذا العام نلتقي بالفنان والمؤلف الموسيقي شربل روحانا الذي أطربنا على دقّات موسيقاه ونقرات عوده في اللاذقية بتاريخ 17/5/2008 ، في الكواليس وأثناء التحضير قبل الحفلة أجرى فريق "أصدقاء شربل روحانا " اللقاء التالي :

* بالبداية منعتقد أنه هالأمسية هي الأولى ألك باللاذقية .... واللاذقية معروفة ببحرها ، شو بيعنيك البحر وخاصة أنو ولادتك ببيئة بحرية "قرية عمشيت الساحلية " ؟
- البحر مدى جميل جداً وكلنا بحاجته ، كل ما منكبر أكتر منصير بحاجته أكتر ، لأنه بصير هو المدى يلي مش موجود ، أو بصعوبة بتلاقيه بأماكن اللي منعيش فيها  والناس اللي منتعاطى معها ، البحر هو المدى وما بيتغير ، اللهم  إلا إذا عم يضيقوه كل فترة وبيعمروا عليه .......... بس بيضل فيه مدى حلو تتطلع فيه .
* لمّا بتألف الموسيقى بتختار أسم المقطوعة قبل وبعدها بتألف عليها موسيقى وألا بتألف الموسيقى وبعدها بتستوحي الاسم ؟
- يجوز الوجهان
* "مقاطعين " أوقات منسمع المقطوعة منحب نعرف شو سبب التسمية مثلاً مقطوعة 13 تموز كتير منحب نعرف بشو مرتبط التاريخ .................
- شربل "مقاطعاً " بس أنا ما بحب خبّر  ، ضحك ضحكته المحببة لنا وأكمل قائلاً : 13 تموز مش حدث سياسي ، هو حدث شخصي .
* كيف بشوف شربل روحانا الظروف السياسية وخاصة بهالأيام وكيف بتأثّر الظروف عليك وعلى موسيقتك ؟ وإلا ممكن من خلال مجيئك اليوم وحفلتك بظل هالظروف  تأثر على الأوضاع السياسية بالمنطقة ؟
- لأ لأ أكيد ما فيي أثّر عالظروف السياسية ، أنا بهالمجال هيدا متلي متل أغلب الناس بلبنان ما بيقدروا يأثروا على مجرى الأمور ، بس عم حاول قد ما فيي ما خلّي الأحداث السياسية والأمنية اللي عم تصير تأثّر على حلمي وطوحي وهيك على تعاطيي الايجابي بالحياة ، عم حاول رغم كل شي كون إيجابي مع الحياة اللي عايش فيها .
* في فنان أو موسيقي  بتحب تعطيه لحن أو تعمل معه عمل موسيقي ؟
- بعد الايام جاية .....(يعني عرفت كيف ) ما في أسم براسي حالياً بس أنه ........  
* "مقاطعين " من القدما مين بتفضل ؟ يعني لمين  بتسمع أوقات هيك  لحن ، بتقول يا ريت هاللحن ألي ؟  
- في ألحان حلوة للأخوين رحباني ، عبد الوهاب ، وديع الصافي ، كل هالكبار اللي منسمعلن  مش بطريقة الحسد ، أنه يا ريت هاللحن ألي ، بس أنه قد ما بكون معجب بهاللحن .......في روائع عنّا ، يعني أجمل شي اللي بيعلقنا بهالمنطقة الفنون والآداب .
* عملت حفلة بحلب بالشهر التالت وهلق بالخامس باللاذقية ، شو انطباعك عن هالمنطقة ، الناس وتفاعلهن مع الفن ؟
- العلاقة كتير قريبة وكتير حميمة رغم الصعوبات بهالوقت ، وخاصة بالتنقل مش كتير سليمة من كل النواحي ، ولكن لمّا أدعى لسوريا بحب أني لبي الدعوة لأنه بالفعل بشعر بحميمية باللقاء مع كتير شباب وصبايا بنبسط أني أتلاقى فيهن ، بعرف أنه كتير مهمين بتجربتي ، هيدا بيعنيني كتير ، وكنّا عم نحكي بالشهر التالت وبالشهر الخامس وعقبال التاسع كمان ، يمكن يكون عندي بجبلة ب 13 تموز ( بس ليه 13 تموز ما بعرف ) .
* سؤال أخير ، نحن أكيد منحب نحافظ على حقوق الفنان ، إبتداءً من شراء النسخ الأورجينال من ألبوماته  ، بس ما بتلاحظ أنه أسعار الأورجينال ما بتتناسب مع دخل كتير من الناس اللي بتهتم بالفن والموسيقى  ؟
- مزبوط ، مشان هيك ما فيه الواحد ياخد موقف راديكالي من يلي عم يعمل  copy "نسخ " ،  لأنه هيدي حلقة ناقصة بتكون ، بدنا نشوف ليه الدخل الفردي مش على المستوى المطلوب ومنفوت بالمشاكل الاقتصادية  ..........شغلة صعبة .........بس بشكل عام لازم الواحد يضل عم يدافع عن حقوق الفنان ، يعني مش مليحة يكون الفنان تعب سنتين أو تلاتة على شغلة و أوقات بكون هو المنتج الشخصي لشغله وما بكون عنده شركة إنتاج وراه ، وبتلاقي نزل العمل يوم الجمعة والسبت أو الأحد بكون صار في نسخ مزورة عن الألبوم ، يعني هون بحس كل الجهد الموسيقي وكل المصاري اللي دفعها راحت سدى ، هو لو في بالمقابل جهات قوية تدعم الفنون كان الواحد يوزع السيديات ببلاش ، يعني أهم فكرة أنو الواحد يكتب موسيقى وأهم فكرة أنو الناس تسمعها ، هلق الواسطة أو الوسيلة يعني إن كان بيدفع مصاري أحسن بكتير ليشجع ويساهم ويمشي ضمن القانون والأخلاق ، بس كمان بذات الوقت قلت أنه ما فيك تكون راديكالي ، ومنعلق المشنقة ل يلي بيعمل نسخ مزورة .........وكمان في كتير ناس قادرة تدفع وبتبعزء مصاري هون وهون بس عندها لذّة أنه ما تدفع حق السيدي فبيعمل copy  وبيبقى بسافر وبروح ويجي وبيعمل نشاطات ، أنا بقول اللي قادر يدفع حق الأورجينال يدفع واللي مش قادر أنا بعطيه copy  .
* منتمنى  من الكل تشجيع موسيقى شربل روحانا وكل الفنون الراقية متل فنك بالحصول على النسخ الأورجينال وحماية حقوق الفنان .
-     شكراً  وبتمنالكم التوفيق .